काठमाडौं / सरकारले चार वटा महत्वपूर्ण नीतिहरु पास गरेको छ । मंगलबार सिंहदरबारमा बसेको सामाजिक समितिको बैठकले स्वास्थ्य तथा जनसंख्या मन्त्रालयले पेश गरेका दुई वटा र महिला, बालबालिका तथा जेष्ठ नागरिक मन्त्रालयले पेश गरेका दुई वटा गरी चार वटा नीति पास गरेको हो ।
गृहमन्त्री बालकृष्ण खाँड संयोजक रहेको उक्त समितिले स्वास्थ्य तथा जनसंख्या मन्त्रालयले पेश गरेको राष्ट्रिय स्वास्थ्य वित्त रणनीति, २०७९/८९ र स्वास्थ्य क्षेत्रमा लैगिक समानता र सामाजिक समावेसीकरण रणनीति, २०७८ पास गरेको हो । राष्ट्रिय स्वास्थ्य वित्त रणनीतिमा कुल बजेटको १० प्रतिशत स्वास्थ्यमा लगानी गर्नुपर्ने उल्लेख छ । यस्तै, स्वास्थ्य क्षेत्रमा लैगिक समानता र सामाजिक समावेसीकरण रणनीति, २०७८ पनि पास गरेको हो ।
उक्त रणनीतिमा स्वास्थ्यमा विपन्न वर्गको समान अधिकार स्थापित गर्ने कुरा अगाडि सारिएको छ । स्वास्थ्य क्षेत्रको लैंगिक समानता तथा सामाजिक समावेशीकरण रणनीतिमा महिला, बालबालिका, मधेसी, दलित, पिछडिएको क्षेत्रमा बसोवास गर्ने व्यक्तिलाई स्वास्थ्यमा समान अधिकार दिनुपर्ने उल्लेख छ ।
