काठमाण्डौ / संसद् बैठक विपक्षी दलबाट अवरोध भएका कारण आधा घण्टाको लागि स्थगित गरिएको छ । बिहान ११ बजे शुरू हुनुपर्ने आजको प्रतिनिधिसभा बैठक आधा घण्टा ढिलो गरी शुरू भएकोमा बैठक शुरू हुनेबित्तिकै माओवादी केन्द्रसहितका विपक्षी दलले उठेर अवरोध गरिरहेका छन् ।
सभामुख देवराज घिमिरेले आफ्ना धारणा राख्न अनुमति दिएपछि माओवादीका सांसद वर्षमान पुनले ‘भिजिट भिसा’ को प्रसङ्ग राख्नुभएको छ । उहाँले गृहमन्त्री रमेश लेखकले राजीनामा दिनुपर्ने र विपक्षी सबै दलको अडान रहेको बताउनुभयो ।
त्रिभुवन विमानस्थल हुँदै ‘भिजिट भिसा’ का नाममा मानिसलाई दुःख दिने, रकम असुल्नेलगायतका विषयमा गृह प्रशासन जोडिएको भनेर प्रश्न उठेकाले गृहमन्त्रीले राजीनामा दिनुपर्ने विपक्षी दलको माग छ ।
हिजो बसेको माओवादी केन्द्रको पदाधिकारी बैठकले गृहमन्त्री लेखकमाथि चौतर्फी प्रश्न उठेकाले नैतिकताका आधारमा राजीनामा दिनुपर्ने निष्कर्ष निकालेको थियो ।
अर्को विपक्षी दल राष्ट्रिय स्वतन्त्र पार्टी (रास्वपा) ले पनि गृहमन्त्री र उहाँको सचिवालय नै यो प्रकरणमा संलग्न रहेको सार्वजनिक भइसकेपछि निष्पक्ष छानबिनका लागि राजीनामा दिन माग गरेको छ ।
